Vörgüstern Avend hett unse Rode Krüüz inlaadt to een poor wunnerbore Stunnen in de Kroog „To´n gülden Steern“ – nee, de Naam heet richdi „Zum goldenen Stern“, ok in een plattdüütschen Text. Dor geev dat Schönet to sehn, smacklichet Eeten un veel Schnackerie ünnernanner.

Dat fung al an bi´t Rinkamen: De Sool weer opwennig utstaffeert. Allens, wat de Harvst hergifft, weer mit Sinn för gude Optik drapeert vör de Theotereck, Bloomenstruuße stunnen an de Siet un lütte Gestecke ut Kastangeln un Heid op de Dischen.

Vörsitterin Heike Mordhorst begrööte söbentig Lüüd un bedanke sik bi de Fruuns, de dat allens al an Dingsdag henbröcht un schön maakt hebben. Twee Schlag Röövenmus (dat eene weer vegan) geef dat denn to eten mit dicke un dünne kockde Wust – dat weer ´n Vergnögen un eten!

Achteran harr Uwe Michelsen ut Süderbrarup sien Optritt. He lövde „de Deko hier un een ´Hoch `an de Köök!“, vertelle een Dööntje ut Bayern, harr de Lacher op sien Siet un legde los mit sien Vördrag över „Momente in der Natur“. Darto harr he Fotos mitbröcht mit Ansichten, de man normalerwies nich to sehn kriggt; denn he hett deelwies veele Stunnen töövt, bit dat topass keem.

So wiese he de „schwatte Sunn“ vun de Spreen, Kadekers, Plüschmoorsen un ok, wodennig een Haas utsücht, wenn he op di tolopen deit. Allens, wat Uwe Michelsen wiese un sä, passe to de Satz: „Wiss du weten, wat Schönheit is, denn gah rut in de Natur!“

Wi wiesen an disse Sted vun all dat bloots dree Biller; sien Vördrag schall jo nich in´t Internet.